عبدالله الشامسي

عبدالله الشامسي

(سالفة عمر)

شفنا وطبنا والدهر من تالي

قطّع حبال الود قبل حبالي ..

واستيقظت الآهات بعد جروحي

وردت علي الأولي والتالي ..

قدني نسيت محبته ووصاله ..

وقدني رضيت بواقعي واحوالي

ف الصدر بيتٍ كل ما غنّيته

استرجع لـ بويه كلامٍ غالي ..

تتعب على حفظ الكرامة حتى

تكسب من الجنة نعيم ظلالي ..

وابن آدم افـ دنياه ماخذ حظه ..

حدٍ تطيب حْظوظه ويختالي ..

وحدٍ تردّى الحظ به واتردّى

وحمّل على صدره هموم ثقالي ..

واذكر لابو راشد عريب المجنى

قولٍ بحفّظهْ لْعيال عيالي ..

(بالعلم والأخلاق نبني جيلًا)

علمٍ مخلّد عن فخر الاجيالي

و(محمد المكتوم) بيت الحكمة

اللي عطى من عمره ولا زالي

يكتب على بحر الخليج حروفه

ويردده موي البحر موالي ..

ودبي قامت للعلا في عهده

عليه بسْم الله وطيب الفالي ..

والشعر قلّدني وسام حْضوره ..

ربّه يحقق لي جميع آمالي ..

واللي قطع وصلي تمنّى وصلي ..

ما ينفع الريم العديم جْفالي ..

وانا الا مني قنصت الفكرة ..

فكيت من ضيق العقول حبالي !

.

عبدالله علي صالح الشامسي

 

Advertisement


H