"مريجب" أقدم الحصون التاريخية
26/05/2016
تاريخ الإمارات له الكثير من المعالم اللي توثق تاريخ المنطقة وتروي سيرتها الجديمة بالقلاع والحصون والقصور اللي حتى يومنا هذا صامدة على الرغم انها كملت مئات السنين على بناءها, ومستحيل تمر على وحدة من الإمارات السبع وما تشوف معلم تاريخي جديم يخبرك عن سيرة المكان.
وحدة من هاي الأماكن التراثية هي "قلعة المريجب" الشهيرة واللي تعتبر وحدة من أقدم القلاع الست في مدينة "العين" تكشف عن التحولات الاجتماعية والسياسية اللي مرت فيها المنطقة خلال القرنين اللي فاتوا.
وسبب تسميتها بـ "مريجب" تعود للهجة المحلية الدارجة اللي تقلب القاف إلى الجيم, فالأصل هي "المريقب" تصغير لكلمة مراقب, وهو اسم على الدلالة الوظيفية للقلعة, لان بنوها للمراقبة.
القلعة ما تشكل معلم سياحي تراثي يخبرك عن تاريخ المنطقة المعماري بس, لكنها تتعدى هالشي عشان تصير سيرة موجزة لتاريخ المنطقة الثقافي والسياسي والإجتماعي والحربي, فالقلعة مرت بمراحل كثيرة من بنوها, وتنوعت مهامها, ووظائفها حتى صارت حديث مدينة العين بأكملها.
بتصرف من البيان
